Walang makakapigil kay EJ Obiena—kahit pa ang hamog na parang ulap!
Lumipad patungong Nantou City ang World No. 4 pole vaulter para sa isang misyon: ang mamayagpag sa Taiwan International Pole Vault Competition. At nagawa niya ito sa harap ng hamog na halos burahin ang tanawin sa Sun Moon Lake kahapon.
Kinamada ni Obiena ang gintong medalya matapos tumalon ng 5.50 metro, tinalo ang Amerikanong si Matt Ludwig (5.30m) na nag-uwi ng pilak.
Pasok din sa laban ang isa pang Pinoy, si Hokket delos Santos, na tinaguriang “susunod na Obiena.” Umiskor siya ng personal-best 5.15m, sapat para sa ika-10 puwesto.
Para kay Obiena, ito ay isang “leap of faith”—literal at figuratively!
“First time kong makaranas ng fog warning sa gitna ng kumpetisyon. Halos wala kang makita! Pero buti na lang, lumusot at nanalo pa rin!”
Dagdag pa niya, hindi laging perpekto ang kundisyon, kaya kailangang matuto at lumaban sa kahit anong pagsubok.
At ayun nga, kahit sa gitna ng hamog, malinaw ang isang bagay—EJ Obiena ang hari ng himpapawid!