Walang patid ang dominasyon ng National University (NU) Lady Bulldogs matapos talunin ang Far Eastern University (FEU) Lady Tamaraws, 25-20, 27-25, 25-21, sa 2025 Shakey’s Super League (SSL) Preseason Unity Cup semifinals sa Ninoy Aquino Stadium.
Sa panalong ito, nakapasok ang defending champions sa ika-apat na sunod na finals appearance, at dalawang panalo na lang sila mula sa inaasam na four-peat title.
Bagaman may twice-to-beat advantage, kinailangan ng NU na ipakita ang kanilang tibay lalo na sa second set, kung saan nailigtas nila ang apat na set points bago tuluyang nakuha ang panalo.
Pinangunahan ni team captain Vange Alinsug ang Lady Bulldogs na nagtala ng 11 puntos (9 attacks, 2 blocks) kasama ang 5 digs at 5 excellent receptions. Nag-ambag din si Celine Marsh ng 9 puntos, habang sina Chams Maaya at Josline Salazar ay may tig-8 puntos.
Ito na ang walong sunod na panalo ng NU sa torneo na suportado nina Shakey’s Pizza Parlor, Peri-Peri Charcoal Chicken, Potato Corner, at R&B Milk Tea.
Makakatapat ng NU sa best-of-three finals ang mananalo sa pagitan ng University of Santo Tomas (UST) at Adamson University sa simula ng championship series sa Nobyembre 8 sa Rizal Memorial Coliseum.
Samantala, ipinakilala rin ang Adamson standout na si Shaina Nitura bilang bagong SSL Ambassador, kapalit ng dating NU star at Alas Pilipinas player na si Bella Belen.