Nagpatawag si North Korean leader Kim Jong Un ng mataas na pulong sa seguridad noong Lunes, ayon sa ulat ng state media, upang magpatupad ng plano para sa “agarang aksyong militar” sa gitna ng tumataas na tensyon sa South Korea.
Dumalo sa pulong sa Pyongyang ang mga nangungunang opisyal sa seguridad, kabilang ang army chief at mga military officials, pati na rin ang mga ministro ng state security at depensa.
Ayon sa Korean Central News Agency (KCNA), itinakda ni Kim ang mga direktiba para sa agarang aksyong militar at mga mahahalagang hakbang para sa pagpapatupad ng war deterrent at karapatang magtanggol sa sarili.
Kasabay nito, inakusahan ng North Korea ang South Korea ng pagpapalipad ng mga drone sa kanilang kabisera at nagpadala na ng mga tropa sa border. Sinabi naman ng South Korea na handa silang tumugon kung kinakailangan.
Iniulat din ng KCNA ang tungkol sa “seryosong provokasyon ng kalaban,” na tumutukoy sa mga paglipad ng drone. Nagbanta ang North Korea na ituturing nilang “declaration of war” kung may makitang drone muli.
Nanatiling teknikal na nasa digmaan ang dalawang Korea simula pa noong 1953.