Iginiit ni Israeli Prime Minister Benjamin Netanyahu na makatarungan ang isinagawang airstrike laban sa mga opisyal ng Hamas sa Doha, Qatar noong nakaraang linggo, dahil umano sa matibay na ugnayan ng Gulf state sa militanteng grupo.
“Qatar ay konektado sa Hamas—tumutulong, nagpopondo, at nagbibigay kanlungan dito. Kaya’t tama lang ang aming naging aksyon,” pahayag ni Netanyahu sa isang press conference.
Ang naturang pambobomba ang kauna-unahang Israeli strike sa Qatar, isang bansang kaalyado rin ng Estados Unidos. Anim ang nasawi, ngunit ayon sa Hamas at Israeli sources, wala sa target na top officials ng grupo ang kabilang sa mga namatay.
Mula 2018 hanggang 2023, milyon-milyong dolyar kada buwan ang ipinadala ng Qatar bilang ayuda sa Gaza na hawak ng Hamas—na noon ay aprubado mismo ng gabinete ni Netanyahu. Ngunit ngayong taon, lumutang ang “Qatargate” scandal matapos akusahang tumanggap ng pera mula Qatar ang dalawang aide ni Netanyahu. Tumestigo pa siya sa imbestigasyon noong Marso, ngunit tinawag niya itong isang “political witch hunt.”
Samantala, bilang tugon sa airstrike, nag-convene ang Qatar ng emergency summit kasama ang Arab League at Organisation of Islamic Cooperation na dinaluhan ng halos 60 bansa, na nanawagan ng aksyon laban sa Israel.
Walang diplomatikong relasyon ang Qatar at Israel, ngunit matagal na nitong pinapahintulutan ang pamamalagi ng mga lider ng Hamas. Bukod dito, mahalaga rin ang papel ng Qatar sa negosasyon para sa tigil-putukan at pagpapalaya ng mga Israeli hostages na dinukot noong Oktubre 7, 2023—ang insidenteng nagpasiklab ng giyera sa Gaza.