Isang negosyante mula Pasig City ang nahaharap sa kasong pagpatay matapos siyang matukoy bilang driver ng isang itim na Mercedes-Benz sedan na umano’y bumaril at pumatay sa isa pang motorista sa isang insidente ng “road rage” malapit sa abalang Edsa-Ayala tunnel sa Makati City noong Martes ng hapon.
Ayon sa pulisya, inaresto ang suspek na si Gerard Raymond Yu noong Miyerkules ng umaga sa kanyang tahanan sa Riverside Village, Pasig, kung saan nakumpiska rin ang sasakyang sangkot sa insidente pati na ang isang pares ng .40-caliber pistols, isa rito ang pinaniniwalaang ginamit sa pamamaril.
Suot ang face mask at may takip ang ulo ng itim na jacket, ipinresenta ang suspek sa Camp Crame sa isang press conference na ipinatawag ng Department of the Interior and Local Government (DILG) at ng Philippine National Police.
“Positibong kinilala ng saksi ang naarestong suspek sa aktwal na pamamaril,” sabi ni Interior Secretary Benhur Abalos.
Nagpositibo si Yu sa gunpowder nitrate, habang ang isa sa mga nakumpiskang baril, isang Taurus pistol, ay tumugma sa fired cartridge case na narekober sa crime scene, ayon kay Abalos.
Ayon sa paunang imbestigasyon, ang biktima na si Aniceto Mateo, 65, ay binaril matapos ang isang mainitang pagtatalo sa suspek bandang 2:30 p.m. noong Martes. Parehong nakita ang dalawang motorista na papalapit sa tunnel sa southbound lane ng Edsa at nag-unahang lumabas sa exit.