Tiniyak ng National Bureau of Investigation (NBI) na magpapatuloy ang kanilang mga operasyon at imbestigasyon sa mga isyung may kinalaman sa korapsyon sa flood control projects at POGO operations, sa kabila ng pagbabago ng pamunuan sa ahensya.
Sa panayam sa dzRH, sinabi ni Angelito Magno, bagong itinalagang officer-in-charge ng NBI, na mananatiling nakatutok ang ahensya sa tungkuling mag-imbestiga ng mga krimen at tumulong sa ibang law enforcement agencies sa malalaking kaso.
“Patuloy ang trabaho ng NBI sa paglutas ng mga krimen at sa pagtulong sa ibang ahensya, lalo na sa mga kasong madalas napapabalita,” pahayag ni Magno.
Dagdag niya, tuloy ang imbestigasyon sa mga iregularidad sa flood control projects, pati na rin ang pagsusuri sa legal framework ng Philippine Offshore Gaming Operators (POGOs) matapos ang serye ng mga raid sa mga pinaghihinalaang POGO hubs.
Patuloy rin umano ang koordinasyon ng NBI sa Bureau of Customs upang labanan ang agricultural smuggling, na matagal nang nagpapahirap sa mga lokal na magsasaka at ekonomiya.
Ayon kay Magno, nananatiling matatag ang pakikipagtulungan ng NBI sa ibang law enforcement agencies at hindi maaapektuhan ng leadership change ang kanilang anti-crime operations.
“The NBI’s commitment to law enforcement and inter-agency cooperation remains firm,” ani Magno.
Itinalaga si Magno bilang bagong pinuno ng NBI matapos tanggapin ni Pangulong Ferdinand Marcos Jr. ang pagbibitiw ni Jaime Santiago nitong Lunes.