Mariing pinabulaanan ng National Bureau of Investigation (NBI) ang mga akusasyon ni dating Anakalusugan party-list representative Mike Defensor na dinetena at tinortyur umano ng ahensya ang aide ni dating kongresista Zaldy Co, na si John Paul Estrada, at ang asawa nito.
Sa pahayag noong Nobyembre 17, sinabi ng NBI na ang mga paratang ni Defensor ay “walang basehan,” “puro haka-haka,” at “walang ebidensiya.”
Ayon sa ahensya, wala umanong reklamo, ulat, o medical record na nagsasabing nasaktan si Estrada o ang kanyang asawa, at wala ring tala na sila ay nasa kustodiya ng NBI.
“Kinokondena namin ang anumang maling at malisyosong pahayag na sumisira sa integridad ng aming institusyon,” dagdag ng NBI, sabay giit na patuloy nitong pinangangalagaan ang transparency, due process at rule of law.
Inakusahan ni Defensor ang NBI na sinaktan at ilegal na ikinulong ang mag-asawang Estrada, saka umano dinala sa Chile gamit ang pekeng pasaporte upang hindi makapagtestigo sa imbestigasyon kaugnay ng flood-control scandal.
Lumabas ang mga akusasyon matapos sabihin ni Co na inutusan umano siya nina Pangulong Ferdinand Marcos Jr. at House Speaker Martin Romualdez na magpasok ng P100 bilyon sa national budget—mga pahayag na tinukoy ng ilang analyst at lider ng Kamara na may maraming inconsistency.
Hinamon ng NBI si Defensor na magharap ng totoong ebidensya kung nais niyang ituloy ang kaso.
“Kung may sapat na basehan, magsasagawa ang Bureau ng nararapat na imbestigasyon. Ngunit sa kawalan ng kredibleng patunay, ang mga alegasyong ito ay mananatiling walang saysay,” babala ng ahensya, sabay banggit na maaari pa itong humantong sa legal action laban sa nagsasampa ng maling paratang.
Kinumpirma rin ng NBI na nakikipag-ugnayan sila sa Bureau of Immigration upang matunton ang kinaroroonan ng mag-asawang Estrada.
Samantala, dalawang linggo na ang nakalipas nang sabihin din ni Defensor na nasa kustodiya ng Philippine Marines si Orly Guteza, na umaming bahagi ng security team ni Co—isa pang pahayag na itinanggi ng Philippine Navy.
Patuloy ang imbestigasyon habang nananatili ang tensiyon sa mga alegasyon na may kinalaman sa kontrobersyal na flood-control project.