Naaresto ang 100 na Pilipino at isang Chinese national matapos salakayin ng National Bureau of Investigation (NBI) ang isang hinihinalang “love scam” hub sa isang condominium sa Makati kahapon.
Ayon kay NBI Director Jaime Santiago, ginamit ng mga suspek ang artipisyal na intelihensiya (AI) para linlangin ang kanilang mga biktima sa pamamagitan ng online romance scams. Ibinunyag ni Santiago na natuklasan ng mga ahente ng NBI na ang mga scammers ay gumagamit ng AI-generated na usapan at pekeng larawan ng mga attractive na babae para akitin ang mga biktima at hikayatin silang mag-invest sa mga pekeng cryptocurrency schemes.
Habang papalapit ang Valentine’s Day, nagbigay babala si Santiago sa publiko, lalo na sa mga gumagamit ng dating apps, na maging maingat. Ipinakita ng mga computers sa operasyon ang bawat hakbang ng mga scammers mula sa pagpapakilala hanggang sa pagpapaniwala sa mga biktima na mag-invest sa cryptocurrency.
Ayon sa NBI, dalawang palapag ng condominium ang ginagamit para sa scam na ito, at isang Chinese national ang nagsisilbing supervisor ng mga empleyado. Sinabi pa ng isang NBI agent na ang mga scammers ay nagsimulang gumamit ng AI upang mapadali ang kanilang panlilinlang, na lumalampas sa mga tradisyonal na romance scams.
Patuloy na nagsasagawa ng imbestigasyon ang NBI sa may-ari ng condominium upang alamin kung paano nakapagtatag ng operasyon ang scam hub.