Binawian ng buhay si Alamansa Ambito, acting principal ng Zapakan Elementary School, matapos pagbabarilin ng mga salarin habang kumakain sa isang karinderya sa Barangay Zapakan, Radjah Buayan, Maguindanao del Sur noong June 10.
Kilala si Ambito sa peacebuilding at community work. Bukod sa pagiging principal, district supervisor din siya sa ilalim ng Bangsamoro education ministry.
Ayon sa mga saksi, kalmado umanong lumapit ang mga salarin habang tanghalian ni Ambito at bigla na lang pinaputukan. Tumakas sila gamit ang motorsiklo.
Kahit sugatan, nagawa pa niyang magtricycle papunta sa pinakamalapit na police detachment bago dalhin sa ospital, kung saan siya binawian ng buhay kinabukasan.
Mariing kinondena ni Mayor Maruja Mastura ang krimen at nanawagang panagutin ang mga salarin.