Natuklasan ng Department of Environment and Natural Resources (DENR) ang maraming paglabag sa batas pangkalikasan ng Monterrazas de Cebu, kasunod ng matinding pagbaha sa Cebu dulot ng Bagyong Tino.
Sa imbestigasyon ng DENR–Central Visayas, lumabas na hindi naiulat ng developer ang 734 punong pinutol sa loob ng 140-ektaryang proyekto sa Guadalupe, Cebu City. Sa unang tala ng DENR noong 2022, may 745 puno sa lugar—subalit 11 lang ang naiuulat ng developer. Ito ay paglabag sa Section 77 ng Presidential Decree 705, o Forestry Code, na nagbabawal sa pagputol at pagkuha ng mga produktong gubat nang walang kaukulang dokumento.
Bukod dito, 10 sa 33 kundisyon ng kanilang Environmental Compliance Certificate (ECC) ang nilabag ng developer. Dahil dito, naglabas ang Environmental Management Bureau ng notice of violation at stoppage order. Kabilang sa mga paglabag ang kawalan ng discharge permits sa ilalim ng Clean Water Act—mga permiso na kailangan para sa legal na paglalabas ng wastewater sa mga daluyan ng tubig.
Napatunayan din ng DENR na nakadulot ng pagbaha ang proyekto matapos makita na 17 detention ponds sa lugar ang barado ng silt at hindi na gumagana nang tama. Ang sobrang tubig ay umagos pababa sa mga pamayanan, bagama’t nasa 5.4 hanggang 11 kilometro ang distansya ng mga pinakaapektadong lugar.
Dahil sa mga natuklasan, ipinatawag ng DENR ang mga developer para sa isang technical conference at posible silang maharap sa administratibong parusa at kasong kriminal.
Kasabay nito, nagbabala ang DENR sa lahat ng developer sa upland areas na i-update ang kanilang disenyo at impact assessments upang umangkop sa mas malalakas na ulan at epekto ng climate change.
Patuloy ding nagsasagawa ng survey ang DENR at joint technical team sa mga komunidad upang alamin ang lawak ng pinsalang dulot ng pagbaha noong Bagyong Tino.