Ibang klase talaga ang singer-songwriter na si Moira dela Torre! Muli na naman niyang nadomina ang Spotify sa pag-abot ng mahigit 2 bilyong streams sa lahat ng kanyang kanta.
Sa ipinadalang release ng talent management ni Moira, ibinandera ang panibagong makasaysayang milestone sa career ng singer.
“MOIRA MULING GUMAWA NG KASAYSAYAN!
“Dinomina ang Spotify sa pag-abot ng 2B streams sa lahat ng credits.
“Pinakamaraming Stream na Filipina Artist, muli na namang nagtagumpay si Moira matapos malampasan ang 2 Bilyong Spotify streams sa lahat ng credits, naging unang Filipino soloist, unang babaeng Filipino artist, at pangalawang Filipino artist sa kabuuan na nakaabot sa milestone na ito ayon sa @allchartsPH.
“Noong parehong buwan noong nakaraang taon, nalampasan ng award-winning singer-songwriter ang 1 bilyong Spotify streams, nangangahulugan na nakakuha siya ng karagdagang 1 bilyong streams sa loob lamang ng isang taon – patunay ng kanyang kasikatan at malaking bilang ng tagasunod.”
Sa kasalukuyan ay nasa Amerika si Moira para sa kanyang 2024 World Tour kasama ang banda kung saan nakatapos na sila ng apat na estado at pawang sold out lahat.
Sa susunod na buwan (Hunyo) ay sa Canada naman ang destinasyon ng mang-aawit.
Dagdag pa, “Napakasarap at inspiradong ibahagi ang paglalakbay ni Moira na minsan ay nangangarap lang na marinig ng mundo ang kanyang musika.
“Mula sa pagkanta ng kanyang puso sa mga lokal na commercial jingles hanggang sa pagiging nangunguna sa larangan ng musika at sa huli ay pagiging Pinakamaraming Stream na Female OPM Artist sa loob ng 7 sunod-sunod na taon.”
Sa ngayon, sobrang tutok si Moira sa kanyang singing career kaya hindi muna niya iniisip ang pagkakaroon ng lovelife.