Dahil sa matinding init, muling ipinatupad ng Metropolitan Manila Development Authority (MMDA) ang 30-minutong “heat stroke break” para sa kanilang field workers, partikular na ang mga traffic enforcers at street sweepers.
Layunin ng patakarang ito na maprotektahan ang kanilang mga tauhan laban sa heat-related illnesses ngayong tumataas ang heat index sa Metro Manila.
Ayon kay MMDA Chairman Don Artes, ang break ay gagawin nang salitan sa bawat area upang matiyak na hindi maaapektuhan ang operasyon at presensya ng kanilang mga tauhan sa lansangan.
Ang patakarang ito ay tatagal hanggang Mayo 31, kung saan maaaring magpahinga ng 30 minuto ang MMDA personnel depende sa kanilang work schedule. Dagdag pa rito, kung umabot sa 40 degrees Celsius pataas ang heat index, bibigyan sila ng karagdagang 15 minutong pahinga.
“Mahalaga ang kalusugan ng ating mga tauhan. Ang inisyatibang ito ay para mapigilan ang anumang sakit na dulot ng matinding init,” ani Artes.
Dahil sa pagtaas ng heat index, ilang paaralan sa Metro Manila ang nagsuspinde ng klase o lumipat sa alternative learning modes.
Kahapon, naitala ang 41-degree Celsius heat index sa lungsod ng Maynila bandang 1:30 p.m., na nasa kategoryang “extreme caution.”
Ayon sa Department of Health (DOH), ang heat index na umaabot sa 42 hanggang 51 degrees Celsius ay maaaring magdulot ng heat cramps, heat exhaustion, at heat stroke kung hindi maagapan.
Payo ng DOH sa publiko: iwasang lumabas mula 10 a.m. hanggang 4 p.m., uminom ng sapat na tubig, magsuot ng preskong damit, at gumamit ng proteksyon tulad ng sumbrero at payong.