Opisyal nang ipinakilala ang 24 na kandidata ng Miss World Philippines na maglalaban para sa korona at karapatang katawanin ang bansa sa Miss World 2026. Ang mga kandidata ay nagmula sa iba’t ibang lungsod, probinsya at rehiyon sa Pilipinas, pati na rin sa mga Filipino community sa abroad.
Iisang reyna lamang ang hahalili kay Krishnah Gravidez, na humakot ng karangalan sa Miss World 2025 sa India matapos makapasok sa Top 8 at tanghaling Miss World Asia—kaya’t mataas ang pamantayang kailangang pantayan ng susunod na mananalo.
Layunin din ng pageant na masungkit muli ang ikalawang Miss World crown ng bansa, matapos ang makasaysayang panalo ni Megan Young noong 2013. Ayon kay Miss World Philippines national director Arnold Vegafria, hinahanap nila ang kandidatang may “X factor”—isang kakaiba, natural at hindi maipaliwanag na kalidad na tunay na naglalantad ng pagiging reyna.
Sa press presentation at sashing, nasilayan ang talino, kumpiyansa at elegance ng mga kandidata. Ilan sa mga napansing posibleng front-runners ay sina Marizza Delgado (Filipino Community of New York), Asia Rose Simpson (Quezon City), Valerie Pawid West (Ifugao), Ansha Lichelle Jones (Zamboanga City), Gabrielle Fuentes Galapia (Pampanga) at Lorraine Ojimba (Rizal).
Sasabak din ang mga kandidata sa iba’t ibang fast-track events tulad ng Top Model, Talent, Sports Challenge, Multi-Media Challenge at Head-to-Head Challenge, bukod pa sa pagpapakita ng kanilang mga adbokasiya alinsunod sa “Beauty with a Purpose.”
Gaganapin ang Charity Gala Night sa Enero 29 sa Okada Manila, habang ang coronation night ay sa Pebrero 3 sa SM Mall of Asia Arena. Sa huli, hindi lang ganda ang hinahanap—kundi isang reyna na magsisilbing mabuting ambassador ng Filipina at ng Pilipinas sa buong mundo.