Bilang patunay ng maagap na paghahanda ng Quezon City government laban sa mga sakuna, inilunsad at ipinamimigay na ng lungsod ang mga RESQC Go Bags—matibay, eco-friendly, at puno ng mahahalagang gamit para sa emergency.

Nagsimula pa noong Hulyo 2025 ang produksyon at pamamahagi ng mga go bag, na unang ibinigay sa mga barangay na itinuturing na hazard-prone o madalas tamaan ng lindol, baha, at iba pang kalamidad.

Ang bawat RESQC Go Bag ay may kasamang mga pangunahing gamit tulad ng flashlight, first aid kit, whistle, bottled water, at iba pang pang-emergency na kailangan ng pamilya sa oras ng sakuna.

Ayon sa lokal na pamahalaan, bahagi ito ng patuloy na inisyatiba ng lungsod na paigtingin ang kahandaan at alertness ng bawat QCitizen sa panahon ng kalamidad.

Pinaalalahanan din ng City Disaster Risk Reduction and Management Office ang publiko na laging maging alerto, handa, at responsable, at agad tumawag sa QC Helpline 122 para sa anumang emergency.

Sa proyektong ito, muling pinatunayan ng Quezon City na isa ito sa mga pinakamaagang kumikilos at pinakanakahandang lungsod pagdating sa disaster preparedness at kaligtasan ng mamamayan.

Ibinunyag ni Senador Raffy Tulfo ang umano’y labis na mahal na body cameras na binili ng Philippine Ports Authority (PPA) noong 2020, na umabot umano sa ₱879,000 bawat isa.

Sa pagdinig ng Department of Transportation (DOTr) budget nitong Oktubre 9, sinabi ni Tulfo na bumili ang PPA ng 191 body cams mula sa kumpanyang Boston Homes sa halagang ₱168 milyon. Ngunit nang puntahan ng kanyang team ang opisina ng supplier, nadiskubreng ordinaryong apartment lang ito at may kapital na ₱10 milyon lamang.

Ayon sa senador, “Skandaloso na masyado ito!” lalo na’t dati nang na-flag ng Commission on Audit (COA) ang nasabing kumpanya sa pag-deliver ng depektibong kagamitan sa Environmental Management Bureau noong 2020. Sa kabila nito, nabigyan pa rin ng PPA ang Boston Homes ng panibagong kontrata noong 2021 — mas mataas pa ang presyo, aabot sa higit ₱1 milyon bawat unit.

Depensa naman ni PPA General Manager Jay Santiago, kasama sa halaga ang integrated operating system na konektado sa CCTV network ng ahensya. Aniya, dumadaan naman daw sa masusing pagsusuri ang bawat bidding bago ito aprubahan.

Hindi kumbinsido si Tulfo at pinuna kung bakit hindi nakita ng post-bidding assessment ang mga “red flags” ng supplier. Hiniling pa niya na tanggalin sa puwesto ang mga sangkot sa evaluation.

Samantala, tiniyak ni DOTr Acting Secretary Giovanni Lopez na personal niyang iimbestigahan ang naturang isyu.

Lumabas sa imbestigasyon ng Department of Public Works and Highways (DPWH) na 421 sa mahigit 8,000 flood control projects sa bansa ang “ghost” o hindi talaga umiiral, ayon kay Secretary Vince Dizon.

Sa press briefing ng Independent Commission for Infrastructure (ICI), sinabi ni Dizon na ang Philippine National Police (PNP), Armed Forces of the Philippines (AFP) at Department of Economy, Planning and Development (DEPDev) ang nagsagawa ng aktwal na inspeksyon sa mga proyekto—kahit wala pang pormal na kasunduan sa DPWH.

“Malaking bagay na independent groups ang nag-validate. Mas credible ang proseso,” ani Dizon. Dagdag niya, patuloy pa ang nationwide validation upang matiyak na totoo at natapos ang mga proyekto sa ilalim ng flood control program.

Samantala, sinabi ni dating Sen. Panfilo Lacson na ang mga “classified” documents ng DPWH ay nagpapakita ng malawak at sistematikong korapsyon sa mga proyekto ng imprastruktura. “Mas tama sigurong tanungin kung sino ang hindi sangkot, kaysa kung sino ang guilty,” aniya.

Dahil dito, nanawagan si Batangas Rep. Leandro Leviste na ibaba ng 25% ang presyo ng DPWH projects para maiwasan ang mga kickback at makatipid ng hanggang ₱400 bilyon sa kaban ng bayan.

Kasabay nito, ipinasabing iimbitahan ng Senate Blue Ribbon Committee sina dating Speaker Martin Romualdez at dating kongresista Zaldy Co sa susunod na pagdinig hinggil sa umano’y kickback sa flood control projects.