Pumanaw na ang aktres na si Michelle Trachtenberg, na kilala sa kanyang mga papel sa “Buffy the Vampire Slayer” at “Gossip Girl”, ayon sa mga ulat ng US media. Siya ay 39 taong gulang.
Ayon sa ulat ng The New York Times, natagpuan ng mga pulis si Trachtenberg sa kanyang apartment sa Manhattan noong Miyerkules ng umaga, hindi na tumutugon at walang malay, matapos silang tumanggap ng emergency call bandang 8:00 AM (local time).
Idineklarang patay ang aktres ng mga rumespondeng medical workers, ngunit hindi pa inilalabas ang opisyal na sanhi ng kanyang pagkamatay. Ayon sa pulisya, walang foul play na pinaghihinalaan.
Samantala, ayon sa ABC News, may mga hindi pinangalanang source na nagsasabing kamakailan lang sumailalim si Trachtenberg sa isang liver transplant at posibleng nagkaroon ng kumplikasyon mula rito.
Isinilang at lumaki sa New York, nagsimula si Trachtenberg bilang child star, kabilang na ang pagiging bida sa 1996 film na “Harriet The Spy”, kung saan nakasama niya si Rosie O’Donnell. Lumabas din siya sa Nickelodeon, partikular sa seryeng “The Adventures of Pete & Pete”.
Sumikat siya nang husto bilang Dawn Summers, ang nakababatang kapatid ng karakter ni Sarah Michelle Gellar sa “Buffy the Vampire Slayer”, mula 2000 hanggang 2003.
Mas lalo siyang nakilala nang gumanap bilang Georgina Sparks, ang sosyalera at villain sa “Gossip Girl” mula 2008 hanggang 2012, kung saan nakasama niya sina Blake Lively, Penn Badgley, at Leighton Meester.
Bukod sa TV, lumabas din siya sa ilang pelikula tulad ng “EuroTrip,” “17 Again,” at “The Scribbler”. Nagkaroon din siya ng guest appearances sa mga seryeng “Weeds” at “Mercy”, at huling napanood sa “Gossip Girl” reboot noong 2022, na itinuturing na kanyang final acting credit.