Nabitin ang kampanya ng mga Pinay na sina Crystal Cariño at Nicole Tabucol matapos silang talunin ng tambalang Thai na sina Phatrawan Simawong at Chiratchayaphon Kenkhunthod, 2-0, sa semifinals ng teqball sa 3rd Asian Youth Games sa Exhibition World Bahrain. Sa kabila ng pagkatalo, may tsansa pa silang makabawi at masungkit ang tansong medalya kung mapagtatagumpayan nila ang host team na sina Rawan Abdulaziz at Fatima Albanna sa girls’ doubles.
Samantala, naranasan ng Alas Pilipinas ang unang pagkatalo nito sa girls’ volleyball matapos yumuko sa makapangyarihang Thailand, 25-21, 25-18, 25-14, sa Hall B ng Isa Sports City. Sa kabila ng kabiguan, nakasama pa rin ang koponang binubuo ng mga atleta mula sa National University sa top eight classification round matapos ang dalawang laban sa Group D.
Magpapatindi pa ang aksyon sa Bahrain simula ngayong araw sa golf, mixed martial arts, muay, taekwondo, at triathlon, kung saan inaasahang may mga pambato ang Pilipinas na posibleng umakyat sa podium. Isa sa mga itinuturing na pinakamalakas na pag-asa sa ginto ay si muay fighter John Brix Ramiscal, kampeon sa junior 16-17 male category sa World Championships sa Abu Dhabi noong nakaraang buwan.