Nagprotesta ang mga Persons Deprived of Liberty (PDLs) sa Bureau of Jail Management and Penology (BJMP) Malabon City Jail noong Huwebes, Nobyembre 6, bilang pagtutol sa umano’y hindi maayos na pagtrato sa kanila sa loob ng kulungan. Bitbit ng mga bilanggo ang mga puting tela at plakard na may mensaheng “Media ibaba si warden” at “F**k the system,” bilang panawagan na mapansin ang kanilang hinaing tungkol sa pagkain, pagbisita ng mga kamag-anak, at pamamalakad ng warden. Ayon sa isang kaanak ng bilanggo, pangunahing reklamo ng mga ito ang kakulangan sa maayos at sapat na pagkain.
Agad na nagtungo si Malabon City Mayor Jeannie Sandoval sa kulungan kasama ang mga opisyal ng BJMP-Regional Office upang makipag-usap sa mga preso at alamin ang kanilang kalagayan. Ipinangako ng alkalde na magbibigay siya ng food packs sa lahat ng PDLs at kinumpirma rin niyang pansamantalang aalisin sa puwesto ang warden habang isinasagawa ang imbestigasyon.
Samantala, sinabi ng bagong talagang hepe ng BJMP-Malabon na si JCINSP Lucky Donisio na patuloy silang nakikipagpulong sa mga lider ng selda upang pag-usapan ang mga hinaing ng mga preso. Aniya, kung mapatunayang lehitimo ang mga reklamo, agad silang kikilos upang ito’y maresolba. Dagdag pa niya, bahagi ng karaniwang proseso ng BJMP ang pagpapalit o reassignment ng mga opisyal, at bukas sila sa ganitong hakbang kung kinakailangan.