Nagbunga ang impluwensya ni Hidilyn Diaz matapos magwagi ng mga gintong medalya ang mga batang weightlifters mula sa kanyang mga training center sa Rizal at Zamboanga City sa ikalawang araw ng Batang Pinoy 2025 na ginanap sa Barangay Labangal Gymnasium.
Pinangunahan ni Stephanie Mandigma ng Rizal ang kampanya matapos makuha ang tatlong ginto sa girls’ 40kg division sa kabuuang 113 kilograms na binuhat. Samantala, nanguna naman si Kyle Nathan Kue ng Zamboanga matapos masungkit ang limang gintong medalya sa boys’ 12-year-old category sa total lift na 150kg (65kg sa snatch at 85kg sa clean and jerk).
Ayon kay Mandigma, malaking inspirasyon sa kanya ang pagkakaroon ng coach na tulad ni Hidilyn:
“Thankful po ako kay Coach Hidilyn. Kung wala po siya, hindi ko makukuha itong gold,” aniya.
Dagdag ni Kue, layunin niyang sundan ang yapak ng kanyang idolo:
“Gusto kong maging susunod na Olympian ng Pilipinas at makapanalo ng maraming medalya tulad ni Ate Hidilyn.”
Nagwagi rin sina Pep Samantha Agosto (girls’ 11-year-old, 135kg total lift) mula sa Rizal at sina Hero Anthony Alas-as, Jane Marie Manalo, Cydrille Jay Andalahao, at Precious Jade Lozada mula sa Zamboanga sa kani-kanilang weight categories.
Sa patuloy na tagumpay ng mga batang atleta, makikitang buhay na buhay ang “Hidilyn effect” — isang patunay na ang inspirasyon ni Diaz ay nagbubunga ng mga bagong kampyon para sa Pilipinas.