Patuloy na nagsisiksikan ang mga basura sa kalsada ng Maynila, kaya’t pinaalalahanan ng Department of Environment and Natural Resources (DENR) ang mga residente na maghain ng reklamo.
Ayon kay DENR Undersecretary Jonas Leones, kapag ang basura ay hindi nakolekta ng mahigit isang linggo at walang aksyon mula sa lokal na pamahalaan, maaari nilang i-report ito sa DENR. Ipadala lang ang mga larawan at ebidensya, at tutulungan nilang ipaalala sa LGU ang kanilang responsibilidad. Kung hindi pa rin kikilos, maaari nilang i-refer ito sa National Solid Waste Commission.
Ayon pa kay Leones, ang mga LGU na hindi tutupad sa kanilang tungkulin ay maaaring managot administratibo at kriminal sa ilalim ng Ecological Solid Waste Management Act.
Simula pa ng Bagong Taon, nagsimula nang magpatong-patong ang basura sa Maynila. Para masolusyunan ito, may bagong kontrata ang mga kumpanya na Philippine Ecology Systems Corp. at MetroWaste Solid Waste Management Corp. upang mangolekta ng basura, at may deadline silang tapusin ang trabaho ngayong Biyernes.
Samantala, nagbigay-linaw ang Malabon tungkol sa pagkakatanggal ng kontrata nila sa MetroWaste dahil sa mga alegasyon ng hindi pagkabayad at hindi pagsunod sa mga kasunduan.