Na-detect na ang dalawang bagong kaso ng mpox sa Metro Manila, kaya’t umabot na sa 12 ang kabuuang bilang ng mga kaso, ayon sa Department of Health (DOH).
Ang ika-11 kaso ay isang 37-taong-gulang na lalaki mula sa NCR na nagkaroon ng sintomas mula Agosto 20. Nakitaan siya ng rashes sa mukha, braso, binti, dibdib, palad, at talampakan. Bagamat walang kilalang contact sa mga may katulad na sintomas, nagkaroon siya ng malapit na skin-to-skin contact bago lumabas ang sintomas. Kasalukuyan siyang nasa ospital mula noong Agosto 22.
Ang ika-12 kaso naman ay isang 32-taong-gulang na lalaki na nagkaroon ng sintomas noong Agosto 14, kabilang ang mga paltos sa kanyang singit at lagnat. Nagkaroon din siya ng intimate contact sa kanyang partner. Matapos kumonsulta sa outpatient clinic, nagkaroon siya ng mga pimple-like lesions sa mukha at anit. Ngayon ay naka-home isolation siya habang hinihintay ang resulta ng laboratory tests.