Itinaas ng Phivolcs sa Alert Level 3 ang status ng Bulkang Mayon nitong Martes, Enero 6, matapos maitala ang patuloy na pag-igting ng aktibidad nito, kabilang ang paglabas ng lava at pagdami ng rockfall events.
Ayon sa ahensya, ang Alert Level 3 ay nangangahulugang tumataas ang posibilidad ng mapanganib na pagsabog. Namataan ang magmatic eruptions sa summit lava dome, na maaaring magdulot ng lava flows at pyroclastic density currents.
Noong Lunes, isang pyroclastic density current ang bumaba sa Bonga Gully matapos gumuho ang bagong labas na lava sa tuktok ng bulkan. Tumagal ito ng halos tatlong minuto at umabot ng hanggang dalawang kilometro mula sa bunganga.
Bagama’t nananatili sa normal ang sulfur dioxide emissions, ipinakita ng pagsusuri ng Phivolcs na may napakabagal ngunit patuloy na pag-angat ng magma, senyales ng nagpapatuloy na effusive eruption. Mula Enero 1, naitala ang 346 rockfall events at apat na volcanic earthquakes—malaking pagtaas kumpara sa mga naitala sa huling dalawang buwan ng 2025.
Dahil dito, pinapayuhan ang mga residente sa loob ng anim na kilometrong permanent danger zone na lumikas. Nagbabala rin ang Phivolcs ng posibleng ashfall sa timog na bahagi ng bulkan, at hinikayat ang publiko na manatiling alerto at sumunod sa mga opisyal na abiso.