Para mas mapabilis at mapabuti ang tugon sa mga emergency, maglalagay ang Department of the Interior and Local Government (DILG) ng 60,000 CCTV cameras sa Metro Manila. Ayon kay DILG Secretary Jonvic Remulla, konektado ang mga camera sa isang command center na siyang magko-coordinate ng lahat ng tawag sa 911.
“Metro Manila ay 620 square kilometers, kaya dapat may camera every 100 meters,” ani Remulla. Ito ang bahagi ng bagong 911 system na papalitan ang 37 hotline numbers mula sa iba’t ibang ahensya at local government units para maging sentralisado ang emergency response ng pulis, bumbero, barangay, at medical teams.
Plano ng DILG na ilunsad ang programang ito bago ang State of the Nation Address ni Pangulong Marcos sa Hulyo. Kasalukuyan na ring inihahanda ang pondo at bidding para sa proyekto.
Pangako ni Remulla, matatanggap ng tumatawag sa Metro Manila ang sagot sa loob ng 3 hanggang 5 minuto, habang sa mga probinsya ay 10 minuto.
Bukod dito, magpapatupad din ang DILG ng 911 system sa Ilocos, Central Visayas, at Bangsamoro Autonomous Region muna, saka susunod ang iba pang rehiyon buwan-buwan.
Bagong Anti-Kidnapping Task Force inilunsad
Sa Camp Crame naman, inilunsad ang Joint Anti-Kidnapping Action Committee (JAKAC) na pangungunahan ng PNP at may kasamang iba’t ibang ahensya tulad ng DOJ, NBI, Bureau of Immigration, at iba pa. Layunin ng komite na sugpuin ang kidnap-for-ransom cases matapos ang pagdukot at pagpatay sa steel magnate na si Anson Que at sa kanyang driver.
Mas pinalakas na ang pagtutulungan para sa mas mabilis at mas epektibong seguridad sa bansa.