Mas pinalakas ng Farm Fresh Foxies ang kanilang lineup para sa paparating na PVL All-Filipino Conference na magsisimula ngayong Sabado sa Filoil Arena matapos kunin ang anim na beteranong manlalaro.
Kabilang sa mga bagong salta sina Mylene Paat, Ara Galang, Bia General, Imee Hernandez, Royse Tubino at Rem Palma, na inaasahang magdadala ng karanasan at dagdag na lakas sa koponan. Makakasama nila sa roster sina Alohi Robins-Hardy, Ces Molina, Jolina dela Cruz, Trisha Tubu, Louie Romero, Lorene Toring, Jheck Dionela at Riri Meneses.
Bukod sa mga bagong manlalaro, may bagong liderato rin ang Foxies sa katauhan ng Japanese coach na si Koji Tsuzurabara, dating bahagi ng Petro Gazz Angels.
Sisimulan ng Farm Fresh ang kanilang kampanya laban sa Nxled sa Martes sa San Juan City, handa na ipakita ang mas buo at mas palaban na koponan.