Hinarap ni Pangulong Ferdinand Marcos Jr. ang panibagong serye ng akusasyon ni dating party-list congressman Zaldy Co, na muling naglabas ng video exposé mula sa abroad. Ayon sa Pangulo, walang bigat ang mga pahayag ni Co hangga’t hindi siya bumabalik sa Pilipinas upang humarap sa kanyang mga kaso.
“Anyone can go online and make all kinds of claims… pero wala ’yang halaga,” ani Marcos.
“Kung may gusto siyang patunayan, umuwi siya. Harapin niya ang kaso niya.”
Sa panibagong video, iginiit ni Co na hindi siya tumanggap ng kahit isang sentimo sa umano’y P253 bilyong flood control budget insertions na sinasabing konektado kina Marcos at dating Speaker Martin Romualdez. Giit niya, “dumadaan lang sa kanya ang pera.”
Ngunit muling binasag ng Pangulo ang mga paratang:
“Ako, hindi nagtatago. Kung may akusasyon ka sa akin, nandito ako. Ikaw, bakit nasa malayo?”
Nauna nang tinawag ng Palasyo ang mga pahayag ni Co bilang “hearsay” at punô ng butas, sabay hamon na gawin ang mga ito sa ilalim ng panunumpa—hindi sa social media.
Samantala, sa panig ni Romualdez, sinabi ng kanyang abogado na hindi pa rin nagpapatunay ng pagkakasala ang International Commission of Inquiry (ICI).
“Malinaw na walang finding of guilt,” ayon kay Atty. Ade Fajardo, at mayroon silang kumpiyansang magiging patas ang Ombudsman, ang tanging may kapangyarihang magdesisyon sa pananagutan.
Nanatili namang bukas si Marcos sa pagsisiyasat sa anomalya sa flood control projects—pero para sa kanya, may isang malinaw na dapat mangyari:
Umuwi si Zaldy Co at harapin ang batas.