Ipinahayag ni Pangulong Ferdinand Marcos Jr. ang kanyang pakikiramay kay dating Pangulong Donald Trump ng Estados Unidos matapos ang tangkang pagpatay sa kanya sa isang rally sa Butler, Pennsylvania noong Sabado.
“Ikinagagalak naming malaman na nasa maayos na kalagayan si dating Pangulong Donald Trump matapos ang tangkang pagpatay sa kanya. Ang aming mga dasal at pag-aalala ay nasa kanya at sa kanyang pamilya,” isinulat ni Marcos sa kanyang X account (dating Twitter) noong Linggo.
“Kasama ng lahat ng nagmamahal sa demokrasya sa buong mundo, kinokondena namin ang lahat ng uri ng karahasang pampulitika. Ang boses ng mamamayan ay dapat palaging nangingibabaw,” dagdag pa niya.
Ayon sa mga ulat ng media, ang 78-taong-gulang na dating pangulo ay agad na inilabas ng entablado na may dugo sa kanyang mukha pagkatapos ng pamamaril, kung saan ang gunman at isang bystander ay napatay at dalawang manonood ay kritikal na nasugatan.
Sinabi ni Pangulong Joe Biden ng Estados Unidos na ang pag-atake ay “karumal-dumal,” at idinagdag na “walang lugar sa Amerika para sa ganitong uri ng karahasan.”
Si Biden ay nakatakdang makaharap si Trump sa halalan ngayong Nobyembre.