Hinimok ni President Ferdinand Marcos Jr. ang mga pulitiko na iwanan ang kanilang mga hidwaan at personal na interes para magtulungan sa ikabubuti ng buhay ng mga Pilipino, habang ang kanyang Partido Federal ng Pilipinas (PFP) ay pumirma ng kasunduan kasama ang Nacionalista Party (NP), ang pinakamatandang political party sa bansa.
Sa paglagda ng kasunduan sa pagitan ng PFP at NP, ipinahayag ni Marcos ang kanyang kasiyahan na ang “natural alliance” sa pagitan nila ay pormal na ngayon.
Si Marcos ang chairman ng PFP habang si Manny Villar, dating Senate President at businessman, ang NP president. Kasama sa NP ang kanyang asawa na si Sen. Cynthia Villar at kanilang mga anak na sina Sen. Mark Villar at Las Piñas Rep. Camille Villar.
“Ang alyansang ito ang bumuo ngayon ng pinakamalaking political bloc sa Pilipinas … Narito tayo ngayon upang pormalisahin ang relasyon na ito at maghanda upang tiyakin na ang mga lider na mananalo sa midterm election sa susunod na taon ay mga lider na nauunawaan na kailangan nating isantabi ang mga partisan at personal na pagkakaiba,” sabi ni Marcos sa kanyang talumpati sa Brittany Hotel sa Taguig City.
“May malalaki at maliliit na pagkakaiba sa pagitan natin. Pero ang pinakamahalaga ay magkasundo tayo sa pinakamahusay na paraan para makatulong sa ating mga kababayan. Iyon ang dapat nating gawin,” dagdag pa niya.
Sumang-ayon ang NP president na kahit may pagkakaiba-iba sa kultura, relihiyon, ekonomiya, at mga ideolohiya, maaari pa ring makahanap ng pagkakaisa ang iba’t ibang political parties.