Walang sinasayang na oras si Manny Pacquiao sa paghahanda para sa kanyang pagbabalik sa ring laban sa WBC welterweight champion na si Mario Barrios. Ayon kay Pacman, halos dalawang buwang ensayo ang kanyang pinuhunan para sa 12-round na bakbakan sa MGM Grand sa Las Vegas ngayong Sabado (Linggo ng umaga sa Pilipinas).
Tanong kung anong istilo ng laban ang inaasahan niya mula kay Barrios, sagot ni Manny: “Kahit anong istilo, ready tayo—slugger man o runner.” Kung iikot-ikot si Barrios, hahabulin niya ito. Kung makipagsabayan, sasabayan din niya.
Hindi rin sigurado si Manny kung aabot sa desisyon ang laban o mauuwi sa knockout. Pero aniya, “Kung may pagkakataon tapusin, bakit hindi? Basta huwag lang maging pabaya sa ring.”
Bagamat underdog si Pacquiao (+235) kontra sa mas batang si Barrios (-360), hindi na bago kay Manny ang lumaban sa mas malalaking hamon. Matatandaan, underdog din siya laban kay Oscar de la Hoya noong 2008—na hindi na bumangon sa ikasiyam na round.
Si Barrios, 30 anyos, ay may suporta ng kanyang coach na si Bob Santos at ng kanyang kapatid na si Selina, na dating pro boxer. Si Pacquiao naman ay matagal nang sinusubaybayan ni Freddie Roach, ang kanyang loyal na trainer mula pa noong 2001.
Sa huli, mensahe ni Manny sa bayan: “Mga kababayan, dasal at suporta lang po ang hiling ko. Para sa ating karangalan ito. Para sa Diyos at para sa Pilipinas!”