Matapos ang pinakamahabang Traslacion sa kasaysayan na tumagal ng halos 31 oras, magsasagawa ang mga ahensya ng gobyerno at mga opisyal ng Quiapo Church ng isang critique session upang pagandahin at ayusin ang susunod na prusisyon sa 2027.
Ayon sa NCRPO, pinag-aaralan ang pagbabago sa ruta at ang disenyo ng andas ng Poong Nazareno upang mapabilis ang takbo ng prusisyon at maiwasan ang pagsisikip, lalo na sa mga makikitid na kalsada. Isa sa mga problemang naranasan ay ang halos 10 oras na pagkakaantala sa Arlegui Street dahil sa sira-sirang lubid at pagkapit ng andas sa daan.
Tatalakayin din sa pulong kung paano mababawasan ang medical emergencies at mas mapalalakas ang kaligtasan ng milyun-milyong deboto. Umabot sa mahigit 1,000 ang tinugunang medical cases ng mga awtoridad, karamihan dahil sa pagod at minor injuries.
Sa kabila ng mga hamon at apat na nasawi, iginiit ng pulisya na naging mapayapa at ligtas ang Traslacion, na tinutukan ng halos 17,000 pulis at libo-libong responder mula sa iba’t ibang ahensya. Layunin ngayon ng pamahalaan na gawing mas maayos, mas mabilis, at mas ligtas ang susunod na Traslacion.