Nagdagdag ang lungsod ng Makati ng tatlong Rosenbauer Smart Firefighting Robots bilang hakbang para mabawasan ang panganib at casualties sa mga bumbero sa mga delikadong insidente, ayon sa anunsyo ng city government kahapon.
Ang bawat robot ay kinokontrol gamit ang dalawang joystick at kayang tiisin ang matinding init at mahinang visibility sa lugar ng sunog. May kapasidad itong magdala ng hanggang 600 kilo, kaya puwede rin nitong i-rescue at dalhin ang mga nasugatan mula sa mapanganib na lugar.
Bukod dito, may turret ito na kayang magbuga ng hanggang 3,500 litro ng tubig na umaabot hanggang 80 talampakan pataas, para mabilis na maapula ang apoy sa matataas na gusali o mahirap abuting bahagi.
Ayon kay outgoing Mayor Abby Binay, malaking tulong ang mga smart robots na ito para mas epektibong matugunan ng rescue teams ang mga kumplikado at mapanganib na sitwasyon, gamit ang mga advanced na teknolohiya na pumupuno sa limitasyon ng tao.
Kasama ang mga firefighting robots sa mga disaster response equipment na nabili ng Makati tulad ng mga mobile command vehicles, aerial fire ladder truck, super tanker, chemical fire trucks, at rescue trucks.
Dahil sa mga ganitong inobasyon, kinilala ang Makati noong 2022 bilang unang Resilience Hub sa Southeast Asia ng United Nations Office for Disaster Risk Reduction, bilang pagkilala sa kanilang masusing disaster preparedness roadmap.