News

Mahigit 14 Milyong Tao, Posibleng Mamatay dahil sa Pagbawas ng US foreign aid!

Published

5 months ago

July 2, 2025

Mahigit 14 milyong tao sa buong mundo, kabilang ang isang katlo na mga batang mas maliit sa limang taong gulang, ang maaaring mamatay dahil sa pagbawas ng pondo para sa US foreign aid, ayon sa isang pag-aaral na inilathala nitong Martes sa prestihiyosong Lancet journal.

Bago ito, ang US Agency for International Development (USAID) ang nagbibigay ng mahigit 40% ng global humanitarian funding hanggang sa pag-upo ni Donald Trump bilang presidente noong Enero. Makalipas ang dalawang linggo, ipinagmamalaki ni Elon Musk, noon ay tagapayo ni Trump, na napabagsak niya ang ahensya.

Ayon kay Davide Rasella, isa sa mga mananaliksik sa Barcelona Institute for Global Health (ISGlobal) at co-author ng pag-aaral, ang pagbawas ng pondo ay “maaaring biglaang itigil o baligtarin ang dalawang dekadang progreso sa kalusugan ng mga mahihirap.”

Ginamit ng mga mananaliksik ang datos mula sa 133 bansa at tinatayang nakaiwas ang USAID ng 91 milyong pagkamatay mula 2001 hanggang 2021 sa mga developing countries.

Ngunit dahil sa planong pagbawas ng pondo ng 83% ngayong taon, inaasahan na maaaring magkaroon ng 14 milyong avoidable deaths hanggang 2030, kabilang ang mahigit 4.5 milyong bata. Ikinumpara ito sa bilang ng mga sundalo na namatay sa World War I na tinatayang 10 milyon.

Nakita rin sa pag-aaral na ang mga programa ng USAID ay nagresulta sa 15% pagbaba ng mortality rate, habang sa mga batang wala pang limang taon, umabot ito sa 32%.

Ang USAID funding ay epektibo sa pagpigil sa pagkamatay mula sa sakit gaya ng HIV/AIDS, malaria, at neglected tropical diseases na bumaba ng higit kalahati sa mga bansa na tumatanggap ng tulong.

Matapos ang pagbawas sa USAID, sumunod din ang ibang donor tulad ng Germany, UK, at France sa kanilang mga foreign aid budget cuts, na maaaring magdulot ng mas maraming pagkamatay.

Kasalukuyang nagpupulong ang mga world leaders sa Seville, Spain para sa pinakamalaking aid conference sa loob ng isang dekada, ngunit hindi dadalo ang US.

Ani Rasella, “Panahon na para palakihin ang tulong, hindi bawasan.”

Bago bumagsak ang pondo, ang USAID ay kumakatawan lamang sa 0.3% ng kabuuang US federal spending, at bawat US citizen ay nag-aambag ng humigit-kumulang 17 cents kada araw.

News

PhilHealth, Naglunsad ng Bagong Ambulance Service Package para sa Emergency Care!

Published

3 days ago

November 21, 2025

pulse_ph

Mas mapapadali na ang pag-access ng emergency care sa bansa matapos ilunsad ng PhilHealth ang bagong Ambulance Service Package, na layong masaklaw ang gastos sa pagbiyahe at agarang pangunang lunas bago makarating sa ospital.

Nag-aalok ang PhilHealth ng tatlong uri ng serbisyo:

Basic Life Support Ambulance – P4,100
Advanced Life Support Ambulance – P4,600
Physician-managed Advanced Life Support Ambulance – P6,100

May hiwalay ding coverage para sa fuel at maintenance, depende sa distansiya mula sa pinanggalingan ng ambulansya hanggang sa ospital:

P250 – unang 5 km
P500 – hanggang 10 km
P750 – 15 km
P1,000 – 20 km
P1,250 – lampas 20 km

Ayon sa PhilHealth, ang bagong package ay ginawa upang tugunan ang emergency needs sa pre-hospital setting, partikular sa mga sitwasyong hindi sakop ng ibang benefit packages. Tinitiyak din ng mga serbisyong ito na ang ambulansya ay may kakayahang magsagawa ng life-saving interventions habang nasa biyahe.

Bahagi ang ambulance service ng PhilHealth Outpatient Emergency Care Benefit (OECB), na layong gawing mas mabilis at mas abot-kaya ang pagkuha ng tulong medikal sa oras ng pangangailangan.

News

DMCI–Nishimatsu, Nakakuha ng Kontrata sa Taguig Segment ng Metro Manila Subway!

Published

3 days ago

November 21, 2025

pulse_ph

Umusad na muli ang Metro Manila Subway Project (MMSP) matapos i-award ng Department of Transportation (DOTr) ang kontrata para sa Taguig segment sa joint venture ng D.M. Consunji Inc. (DMCI) at Nishimatsu Construction.

Batay sa dokumentong nakuha ng The STAR, nakakuha ng P21.73 bilyon ang DMCI–Nishimatsu para sa Contract Package 105 (CP 105), na sumasaklaw sa pagtatayo ng 0.66 km tunnel at dalawang istasyon: ang Kalayaan Station (242.2 m) at BGC Station (436.05 m). Inaasahan na aabutin ng 67 buwan o halos 6.5 taon bago makumpleto ang segment.

Ito ang unang subway contract award mula 2022, senyales ng pag-usad matapos ang mga delay na nagpalawig sa completion ng buong proyekto hanggang 2032, mula sa orihinal na 2028 target.

Dalawa pang kontrata ang kailangang i-award ng DOTr ngayong taon—CP 108 (Lawton to Senate) at CP 109 (airport line)—para makasabay sa bagong project timeline.

Para sa DMCI–Nishimatsu tandem, ito na ang ikalawang MMSP package na kanilang napanalunan, matapos ang CP 102 (East Avenue–Quezon Avenue) noong 2022.

Ang MMSP, ang kauna-unahang underground railway ng bansa, ay may 33 km at 17 stations mula Valenzuela hanggang NAIA. Kapag natapos, mapapaiksi nito ang end-to-end travel time sa 35 minuto—isang malaking hakbang para sa mas mabilis na pagbiyahe sa Metro Manila.

News

Scam na Gumagamit sa Pangalan ng Pulis, Naglipana Habang Papalapit ang Pasko!

Published

4 days ago

November 20, 2025

pulse_ph

Naglabas ng babala ang Philippine National Police (PNP) sa publiko laban sa mga scammer na gumagamit ng pangalan ng organisasyon para manghingi ng pera o tulong, lalo na ngayong papalapit ang kapaskuhan.

Ayon kay acting PNP chief Lt. Gen. Jose Melencio Nartatez Jr., mahigpit na ipinagbabawal ang anumang uri ng solicitation na gumagamit ng pangalan ng PNP. Pinapaalalahanan niya ang publiko na mas nagiging aktibo ang mga scammer tuwing holiday season.

Kamakailan, nakapansin ang pulisya ng pagdami ng pekeng text messages, emails, tawag at social media posts na nagpapanggap na kumakatawan sa PNP o sa diumano’y proyekto nito. Dahil dito, inatasan ni Nartatez ang mga pulis na agad maglabas ng advisories upang ipaalam na hindi awtorisado ang mga solicitation na ito.

Dagdag ni PNP spokesman Brig. Gen. Randulf Tuano, nakikipagtulungan ang PNP sa media upang mas mabilis na maiparating sa publiko ang mga modus ng scammers.

Hinimok ng PNP ang lahat na i-report agad sa Anti-Cybercrime Group ang anumang kahina-hinalang mensahe o tawag. Sa panahon ng Pasko, paalala ng pulisya: maging mapanuri at huwag magpaloko.