May inaabangang bagong obra ang multi-awarded Filipino director na si Lav Diaz — at baka ito na ang susunod niyang pasok sa prestihiyosong Cannes Film Festival!
Sa isang masterclass sa Doha Film Festival nitong weekend, inamin ni Diaz na natapos na niya ang 2-hour and 45-minute version ng pelikulang “Magellan”, na pinagbibidahan ng Hollywood star na si Gael Garcia Bernal. Pero huwag magulat — balak pa rin ni Diaz gumawa ng full-length 9-hour cut, trademark niya sa mga mahahabang pelikula.
Bagamat tinanong kung Venice Film Festival ang target na premiere, ang sagot niya: mas interesado siyang magpakita sa isang “importanteng festival sa France” — a.k.a. Cannes.
May matibay na koneksyon si Diaz sa Cannes, kung saan ipinakita niya ang “Norte, Hangganan ng Kasaysayan” noong 2013, at “Ang Hupa” noong 2019. Pero hindi rin biro ang record niya sa Venice, kung saan nanalo siya ng mga major awards tulad ng Golden Lion para sa “Ang Babaeng Humayo.”
Ang pelikula ay umiikot sa Portuguese explorer na si Ferdinand Magellan — na kilala sa kasaysayan ng Pilipinas matapos siyang mapatumba ng mga mandirigma ni Lapu-Lapu noong 1521. Pero may twist: ang pelikula raw ay inspired din sa asawa ni Magellan, si Beatriz, na ikinasal sa kanya dalawang taon bago siya maglayag.
Sa mas maikling bersyon ng pelikula, nakatutok ang kwento kay Magellan mismo (played by Bernal), pero sa mas mahaba, mas lalalim ang papel ni Beatriz.
At hindi lang ‘yan — isiniwalat din ni Diaz na may balak siyang mag-adapt ng isang akda ni Alexandre Dumas sa pelikula bago matapos ang taon, matapos ma-delay dahil sa pagkakasakit habang tinatapos ang “Magellan.”
Abangan kung mapapasama ang pelikula sa official lineup ng Cannes 2025, na ilalabas ngayong Abril.