Ipinatawag ng Land Transportation Office (LTO) ang mga rehistradong may-ari ng 19 motorsiklo na nasangkot sa ilegal na karera sa San Rafael, Bulacan.
Ayon kay LTO chief Vigor Mendoza II, naglabas ng hiwalay na show-cause orders ang intelligence and investigation division ng ahensya matapos makatanggap ng ulat tungkol sa insidente noong Agosto 17.
Sa kautusan, inatasan ang mga may-ari na ipaliwanag kung bakit hindi sila dapat papanagutin sa paglabag sa mga regulasyon sa kaligtasan sa kalsada. Kailangan nilang humarap sa tanggapan ng LTO sa Quezon City sa Agosto 27.
Binigyang-diin ng LTO na ang hindi pagdalo ay ituturing na pag-waive ng kanilang karapatang marinig.
Samantala, 24 katao kabilang ang 12 menor de edad ang naaresto ng pulisya sa operasyon sa kahabaan ng Mabalas-Balas-Galas-Maasim Bypass Road.
“Bukod sa karerahan sa pampublikong kalsada na dinadaanan ng mga sasakyan, nagpe-perform pa sila ng mapanganib na stunts kasama ang mga menor de edad,” ani Mendoza. “Hindi natin palalampasin ito lalo’t nagkaroon ng aksidente sa lugar at isang bata ang nasugatan.”
LTO Ipinatawag ang 19 na May-ari ng Motorsiklo na Sangkot sa Karera sa Bulacan!
