Sa gitna ng dalawang araw na nationwide transport strike, inanunsyo ng Land Transportation Franchising and Regulatory Board (LTFRB) na pinag-aaralan nila ang pagsama ng mga unconsolidated jeepney operators sa mga umiiral na kooperatiba.
Ayon kay LTFRB Chairman Teofilo Guadiz, layon ng ahensya na isama ang mga miyembro ng Pagkakaisa ng mga Samahan ng Tsuper at Opereytor Nationwide (Piston) at Manibela sa public utility vehicle modernization program (PUVMP).
Bagaman lumampas na ang deadline ng consolidation noong Abril 30, pinapayagan pa rin ang mga jeepney operators na sumali sa mga umiiral na kooperatiba o korporasyon, ngunit hindi na sila maaaring magtayo ng sarili nilang grupo.
Naglunsad ng transport strike ang Piston at Manibela upang igiit ang pagbabalik ng kanilang limang taong prangkisa na nag-expire na.
Ayon sa gobyerno, maliit lamang ang naging epekto ng transport strike, na bahagi na raw ng pangkaraniwang eksena tuwing rush hour.
Ipinahayag ni Guadiz na magpapatuloy ang PUVMP, at nasa 83 porsyento na ang rate ng consolidation. Gayunpaman, hindi pa mandatory ang pagbili ng modernong jeep hanggang makalipas ang tatlong taon.
Samantala, naging mahaba ang pila ng mga commuter sa Pasig, Manila, Las Piñas, at Quezon City dahil sa limitadong bilang ng mga jeep kahapon.