Inaasahan ng Philippine Ports Authority (PPA) ang pagdagsa ng mga pasahero sa mga pantalan sa darating na Oktubre 30 at 31, kaugnay ng paggunita ng Undas.
Ayon kay PPA spokesperson Eunice Samonte, ngayong taon ay mas maraming biyahero kumpara noong nakaraang taon dahil naka-bakasyon na ang mga estudyante.
“Inaasahan naming mas marami ang pupunta sa mga pantalan ngayon, lalo na’t bakasyon na ng mga estudyante,” ani Samonte sa panayam sa PTV.
Kabilang sa mga pantalan na inaasahang pinakamaraming pasahero ay ang:
- Port of Iloilo
- Port of Jordan (Guimaras)
- Port of Batangas
- Port of Calapan (Oriental Mindoro)
- Port of Bredco (Banago, Bacolod)
Upang matiyak ang maayos na biyahe, suspendido muna ang day-off ng mga tauhan ng PPA para makapagbigay ng tuloy-tuloy na serbisyo at tulong sa mga pasahero.
Itinakda ng Malacañang ang Oktubre 31 (All Saints’ Day Eve) at Nobyembre 1 (All Saints’ Day) bilang special non-working holidays, kaya inaasahang uuwi sa kani-kanilang mga probinsya ang maraming Pilipino upang dalawin ang puntod ng kanilang mga mahal sa buhay.