Pwedeng maging susunod na weapon sa laban kontra tropical diseases ang mga genetically engineered na lamok na may ‘toxic’ semen, ayon sa mga siyentipiko mula sa Australia. Ang bagong pamamaraan, tinatawag na “toxic male technique,” ay naglalayong magpalahi ng mga lamok na may venomous proteins sa kanilang semen, na magpapatay sa mga babaeng lamok pagkatapos mag-mate.
Target ng eksperimento ang mga babaeng lamok dahil sila lang ang kumakagat at kumukuha ng dugo, kaya sila ang nagdadala ng mga sakit tulad ng malaria at dengue.
Ayon kay Sam Beach mula sa Macquarie University, mabilis ang epekto ng teknolohiyang ito tulad ng pesticides, pero hindi nito pinapalaganap ang panganib sa ibang mga species. “Isang makabago at sustainable na solusyon ito para sa mas malusog na komunidad,” dagdag niya.
Sa kanilang unang pagsubok gamit ang fruit flies, napatunayan na ang mga babaeng langaw na nakipag-mate sa “toxic” males ay nagkaroon ng mas maikling buhay. Susunod na ang eksperimento sa mga lamok.
Bagamat promising ang resulta, kailangan pa ng masusing testing at pagtiyak na walang panganib sa tao at iba pang mga hayop.