Matapos muling maibalik bilang chairman ng Senate Blue Ribbon Committee, inanunsyo ni Sen. Panfilo “Ping” Lacson na ipapatawag niya ang 17 kongresista na umano’y nasangkot sa malakihang anomalya sa flood control projects.
Ayon kay Lacson, ipinadaan na niya sa House Speaker Faustino “Bojie” Dy III ang imbitasyon para sa mga mambabatas na binanggit sa affidavit ng contractor couple na sina Curlee at Sarah Discaya.
Kabilang sa mga inimbitahan ay sina dating House Speaker Martin Romualdez, dating Ako Bicol Rep. Zaldy Co, at Benguet Rep. Eric Yap, na unang iniuugnay ng dating Marine at whistleblower na si Orly Guteza.
Sinabi ni Lacson na nakahanda na ang pagdinig sa Biyernes, at isang “mahalagang testigo” ang magbubunyag umano ng bagong detalye sa katiwalian. Gayunman, lumulutang ngayon ang usap-usapan na hindi mahanap si Guteza, ang tinaguriang “ghost witness” nina Mike Defensor at Rodante Marcoleta, na unang lumitaw sa Senado noong Setyembre.
Ayon kay Defensor, wala silang direktang komunikasyon kay Guteza, at tanging sa pamamagitan ng isang third party sila nakakatanggap ng balita.
“Wala pa ring opisyal na subpoena ang pamilya niya. Hindi rin namin alam ang eksaktong kinaroroonan niya ngayon,” ani Defensor.
Sinabi rin niyang nananatiling determinado si Guteza na magsiwalat ng katotohanan, bagaman nangangamba ito para sa kaligtasan ng kanyang pamilya.
Samantala, sinabi ng Office of the Ombudsman na maghahain ito ng unang mga kaso sa Sandiganbayan sa loob ng dalawang linggo, kabilang si Zaldy Co at ilang dating opisyal ng DPWH kaugnay ng P289-milyong flood control project sa Naujan, Oriental Mindoro, na idineklarang substandard o hindi naisagawa.
Sa kabilang dako, iniulat ng House infrastructure committee na may 10 flood control projects sa Davao Region na natuklasang “ghost” o problemado, kabilang ang mga proyekto sa unang distrito ni Rep. Paolo Duterte.
“Kung sa Luzon ang sentro ng ghost projects ay sa Bulacan, sa Mindanao naman ito ay sa Davao Occidental,” pahayag ni Rep. Terry Ridon.
Habang papalapit ang muling pagdinig ng Senado, nananatiling mainit ang isyu ng flood control corruption, at lalo pang lumalalim ang misteryo sa pagkawala ng testigong maaaring makapagbunyag ng buong katotohanan.