Inanunsyo ng Quezon City government na ligtas na mula sa African swine fever (ASF) ang 14 na lechon establishments sa La Loma na pansamantalang ipinasara noong Nobyembre 13. Tatlo sa mga tindahan ang nabigyan na ng lifting orders at pinayagang magbalik-operasyon, habang ang iba ay patuloy na tinutulungan para makasunod sa lahat ng health at sanitary requirements.
Ayon sa city government, sumailalim ang lahat ng tindahan sa isang linggong daily disinfection bilang pagsunod sa memorandum ng Bureau of Animal Industry. Bukod dito, inobliga rin silang magpatupad ng mahigpit na sanitary, safety at health protocols upang matiyak ang kalidad at kaligtasan ng kanilang produkto.
Tiniyak ng lokal na pamahalaan na isolated ang ASF cases na natukoy at walang banta sa ibang pamilihan sa lungsod. Magpapatuloy naman ang QC government sa pagbibigay ng gabay sa mga negosyante upang mapanatili ang mataas na kalidad ng sikat na La Loma lechon.