Pinasok na ng Letran Knights ang kasaysayan bilang kauna-unahang kampeon ng NCAA Mobile Legends: Bang Bang matapos talunin ang JRU Heavy Bombers, 3-1, sa grand finals nitong Linggo, July 27, sa Philippine GameDev Expo sa SMX Convention Center.
Bumagsak man sa upper bracket laban sa JRU, hindi sumuko ang Knights—nagbawi sila sa lower bracket kontra Mapúa (3-1) at naipilit ang rematch sa finals.
Pagdating sa rematch, ibang Letran na ang humarap. Mabilis nilang tinambakan ang JRU ng 2-0 lead. Nabawi lang ng Bombers ang Game 3 matapos nilang tutukan si Letran jungler John Marcus Loyola, pero hindi rin nagtagal ang kanilang pag-asa.
Sa Game 4, bumalik ang momentum sa Knights—mahusay ang draft, linis ang rotation, at panalo sa team fights. Tinapos nila ang laro sa loob ng 15 minuto at kinumpleto ang kanilang redemption arc.
Ang torneo ay inorganisa kasama ng Collegiate Center for Esports (CCE), na layong bigyang daan ang mga estudyanteng nangangarap ng career sa esports.
“Matagal na naming pangarap ito para sa kabataan,” ani CCE founder Stanley Lao. “Basta tuloy lang sila sa pangarap nila, tuloy rin kami sa suporta.”