Mariing itinanggi ni Kim Soo-hyun ang mga alegasyong ikinakalat ng YouTube channel na HoverLab Inc., na nagsasabing may matagal silang relasyon ng yumaong aktres na si Kim Sae-ron.
Ayon sa nasabing channel, nagkaroon umano ng anim na taong relasyon ang dalawa, simula pa noong 15 anyos pa lang si Sae-ron at 27 naman si Soo-hyun. Sinabi rin nilang nakumpirma nila ito mula sa pamilya ng aktres.
Agad namang sinagot ng Gold Medalist, ang ahensya ni Soo-hyun, ang isyu sa pamamagitan ng isang opisyal na pahayag noong Marso 11, kung saan tinawag nilang “walang basehan” at “malisyoso” ang paratang.
Hindi lang iyon—pinalawak pa ng HoverLab ang mga akusasyon, sinasabing sangkot din si Soo-hyun sa umano’y harassment kay Sae-ron at sa maling paghawak sa kanyang kontrobersyal na DUI case noong 2022.
Nagbanta naman ang Gold Medalist na maghahain sila ng pinakamabigat na legal na aksyon laban sa HoverLab para sa pagpapakalat ng maling impormasyon.
Bagong Ebidensya?
Kahapon, Marso 12, lumutang ang panibagong alegasyon, kabilang ang isang diumano’y text message mula kay Sae-ron kay Soo-hyun noong Marso 19, 2024.
Sa mensaheng ito, humihingi umano ng palugit si Sae-ron upang mabayaran ang ₩700 milyon ($525,000) na utang, ngunit hindi raw siya sinagot ng aktor. Ilang araw matapos nito, Marso 24, 2024, nag-post umano si Sae-ron ng isang larawan nila ni Soo-hyun na may dikit na pisngi—bagamat agad niya rin itong binura.
Bukod dito, inilabas din ng HoverLab ang isa pang larawan kung saan tila hinahalikan umano ni Soo-hyun si Sae-ron sa pisngi noong 15 anyos pa lang ang aktres.
May lumabas ding sulat na diumano’y isinulat ni Sae-ron noong Marso 24, 2023, kung saan sinabi niyang nagsimula ang relasyon nila noong 2015 at tumagal hanggang 2021. Sinabi rin niya na hindi siya nabayaran nang tama ng Gold Medalist, at kalaunan ay siningil siya ng ahensya para sa utang bago tuluyang tinanggal sa kumpanya noong 2022.
Naglabas din ng pahayag ang ina ni Sae-ron sa pamamagitan ng HoverLab, na nagsabing gusto niyang malinis ang pangalan ng kanyang anak mula sa mga maling ulat.
Sa ngayon, hindi pa nagbibigay ng bagong sagot si Soo-hyun at ang kanyang ahensya tungkol sa mga pinakabagong paratang.