Buhay na buhay ang pangarap ni Kevin Quiambao na makapasok sa NBA.
Ayon kay Gilas Pilipinas head coach Tim Cone, makikipag-workout ang two-time UAAP Most Valuable Player sa limang NBA teams sa darating na Hulyo 11. Sinabi ni Cone na ang resulta ng workout na ito ang magtatakda ng susunod na hakbang ni Quiambao.
“Sa ika-11 ng Hulyo, magwo-workout siya sa harap ng limang NBA front offices. Doon malalaman kung ano ang susunod niyang iskedyul,” ani Cone.
Lumipad na si Quiambao patungong Estados Unidos upang paghandaan ang kanyang posibleng stint sa NBA Summer League. Bagaman hindi siya nakasama sa roster ng Sacramento Kings, nananatili ang interes sa kanya ng ilang koponan.
“Kung makakakuha siya ng interes mula sa mga teams, maaari siyang manatili sa Summer League nang mas matagal. Kung hindi, babalik siya sa bansa nang mas maaga,” dagdag ni Cone.
Nakatakdang tumakbo ang NBA Summer League mula Hulyo 10 hanggang 20, kasabay ng paghahanda ng Gilas para sa FIBA Asia Cup sa Saudi Arabia sa susunod na buwan.