Nakiusap si Rolan “Kerwin” Espinosa kay Pangulong Marcos na bigyan ng katarungan ang kanyang pamilya sa pagkamatay ng kanyang amang si Rolando Espinosa Sr., dating mayor ng Albuera, Leyte, na pinaslang habang nakakulong sa gitna ng war on drugs ng administrasyong Duterte.
“Humihiling ako sa ating mahal na Pangulo at sa Kongreso na magbigay ng katarungan para sa pagkamatay ng aking ama, na pinatay na parang hayop habang nakadetenido,” pahayag ni Kerwin sa isang press conference kung saan inilunsad din ang kanyang kandidatura para sa posisyon ng alkalde na dati ring hinawakan ng kanyang ama.
Iginiit ni Kerwin na walang kasalanan ang kanyang ama nang arestuhin ito sa mga kaso ng droga at kalaunan ay pinaslang sa umano’y engkwentro sa mga operatiba ng PNP sa loob ng kanyang selda noong Nobyembre 5, 2016.
Si Rolando Sr. ay nahalal na mayor ng Albuera noong Mayo 2016 ngunit nahuli nang maisama ang kanyang pangalan sa listahan ni Duterte ng mga politiko na dawit sa iligal na droga.
Binigyang-diin ni Kerwin na marami ang mga inosenteng buhay ang nawala dahil sa war on drugs, lalo na ang kanyang ama. “Gusto kong humingi ng katarungan para sa mga namatay dulot ng kampanya laban sa droga, lalo na para sa aking ama na pinatay habang nakakulong,” dagdag pa niya. Handang magpatotoo si Kerwin sa International Criminal Court ukol sa brutal na laban sa droga noong panahon ni Duterte.