Opisyal nang inanunsyo ang mga housemates ng kauna-unahang “Pinoy Big Brother Celebrity Collab Edition” na mapapanood sa GMA-7.
Kasama sa mga kilalang personalidad na papasok sa bahay ni Kuya ay sina Ashley Ortega, Klarisse de Guzman, Michael Sager, at AC Bonifacio.
Si Ashley ang unang ipinakilalang housemate at siya rin ang naatasang sunduin ang kanyang mga kapwa GMA-7 stars na isa-isang isinapubliko bilang mga opisyal na housemates. Kabilang dito sina AZ Martinez, Will Ashley, Josh Ford, Charlie Fleming, Dustin Yu, at Mika Salamanca.
Samantala, mula naman sa ABS-CBN ay pinangunahan ni singer Klarisse de Guzman ang pagpapakilala sa mga kapwa Kapamilya housemates na sina Esnyr, Brent Manalo, River Joseph, Ralph de Leon, at Kira Ballinger.
Sa huling bahagi ng episode, ibinunyag na si Michael Sager, na kasalukuyang napapanood sa rom-com series na “My Ilonggo Girl”, ay bahagi rin ng opisyal na housemates.
Samantala, si Ivana Alawi ay itinampok bilang espesyal na house guest na may misyon na kumbinsihin ang mga housemates na siya ay opisyal na kasali at magbigay ng tatlong regalo sa tatlong housemates.
Nag-iwan ng matinding bitin ang episode nang ihayag sa hosts na sina Gabbi Garcia, Alexa Ilacad, Mavy Legaspi, at Melai Cantiveros na kailangan nilang kumpletuhin ang isang task bago makalabas ng bahay.
Tanging sina Gabbi at Mavy lamang ang bago sa PBB experience, habang sina Melai at Alexa ay dating housemates sa mga naunang edisyon ng Pinoy Big Brother.