Laking dismaya ng Gilas Pilipinas at ng fans nito nang kinumpirma ang pinakamasamang balita: may torn ACL si Kai Sotto. Dahil dito, pansamantala siyang mawawala sa aksyon at kakailanganin ng mahabang panahon para sa kanyang rehabilitasyon.
Bagamat malungkot ang sitwasyon, positibo pa rin si Kai na babalik siya nang mas malakas.
“Pinakamalupit na simula ng taon at siguro ang pinakamadilim na araw ng career ko. Sinabi sa akin na may torn ACL ako,” ani Kai, na nagtamo ng injury noong nakaraang Linggo sa kanilang laban kontra Mikawa Seahorses sa Japan B. League.
“Tough itong tanggapin. Pero maraming salamat sa pagmamahal at suporta mula sa lahat. Alam kong may mas magandang plano si God para sa akin, kaya tuloy lang tayo,” dagdag niya.
Samantala, patuloy na susuportahan ng Gilas Pilipinas ang 7-foot-3 big man habang nagpapagaling ito.
“Masakit para sa kanya at sa team, pero bata pa si Kai at marami pang basketball ang naghihintay sa kanya,” sabi ni Gilas coach Tim Cone. “Kakayanin naming maglaro kahit wala siya sa ngayon. Walang duda, worth the wait si Kai, at inaabangan namin ang pagbabalik niya.”
Karaniwang tumatagal ng anim hanggang siyam na buwan ang paggaling mula sa ACL injury. Dahil dito, malabo nang makalaro si Kai sa huling window ng FIBA Asia Cup Qualifiers sa Pebrero, pati na rin sa tournament proper sa Agosto sa Jeddah, Saudi Arabia.