Sa panayam ni Jillian Ward sa programang Fast Talk with Boy Abunda noong Oktubre 21, tahasan niyang itinanggi ang mga kumakalat na tsismis na may relasyon umano siya kay dating Ilocos Sur governor Chavit Singson. Ayon sa batang aktres, matagal nang umiikot ang mga paratang na may “sugar daddy” siya at ang kanyang marangyang pamumuhay ay galing sa benefactor, ngunit aniya’y bunga ng 15 taon niyang pagtatrabaho sa showbiz ang lahat ng kanyang tinatamasa.
Emosyonal na sinabi ni Jillian na masakit para sa kanya at sa kanyang ina, si Jennifer, ang mga paratang na ibinubugaw umano siya kapalit ng pera o negosyo. Ipinagtanggol niya ang kanyang pamilya, binigyang-diin na sariling kita ang ipinambili niya ng kanyang mga ari-arian gaya ng second-hand Porsche Boxster, at na may patunay siya sa lahat ng ginastos sa kanyang engrandeng debut sa Okada Manila, kung saan tumulong din ang GMA Network at mga kaibigan.
Dagdag pa ni Jillian, wala raw katotohanan ang mga kumakalat na video at balitang may lihim siyang anak o nakikitang kasama ang matatandang lalaki. Aniya, apat na taon siyang nanahimik ngunit napuno na siya sa mga paninira. Pinabulaanan din ni Singson kamakailan ang isyu bilang “marites lang,” habang si Jillian naman ay pinag-iisipan na, kasama ang GMA, na magsampa ng kasong cyber libel laban sa mga nagpapakalat ng maling impormasyon.