Mas pinalalakas pa ni Filipino-American singer at America’s Got Talent Season 20 winner na si Jessica Sanchez ang kanyang koneksyon sa Pilipinas. Inihayag niya ang kasabikang umawit sa ASEAN Summit sa Mayo 2026 matapos siyang personal na imbitahan ni Pangulong Ferdinand “Bongbong” Marcos Jr.
Ayon kay Jessica, pinag-iisipan na niya nang mabuti ang mga kantang aawitin dahil nais niyang maipagmalaki at maayos na katawanin ang mga Pilipino sa nasabing event.
Bukod dito, ibinunyag ng singer na ilalabas niya ang kanyang bagong album sa unang quarter ng susunod na taon. Kasama sa mga plano niya ang pag-record ng mga kantang Tagalog at pakikipagtulungan sa mga lokal na artist, bagay na labis niyang ikinagagalak.
Binalikan din ni Jessica ang mahaba at minsang masakit na journey niya sa iba’t ibang singing competitions—mula sa unang pagsubok sa AGT noong 11 taong gulang siya, hanggang sa pagkatalo sa American Idol, bago tuluyang magwagi sa AGT makalipas ang halos dalawang dekada. Aniya, patunay ito na ang mga bagay na nakalaan ay dumarating sa tamang panahon.
Dagdag pa niya, naging mas espesyal ang kanyang panalo dahil kasabay nito ang pagiging ina niya sa kanyang unang anak. Umaasa rin si Jessica na magsilbing inspirasyon ang kanyang kuwento sa mga nangangarap, lalo na sa kapwa Pilipino.
Noong Disyembre, bumisita si Jessica sa Malacañang kung saan nakilala niya nang personal sina Pangulong Marcos at Unang Ginang Liza Araneta-Marcos.