Inanunsyo ng Matchroom Boxing na magkakaharap sa ring sina YouTube star–turned–boxer Jake Paul at dating heavyweight world champion Anthony Joshua sa Kaseya Center, Miami sa darating na Disyembre 19. Ang laban ay mapapanood nang live sa Netflix, at binubuo ng walong three-minute rounds gamit ang 10-ounce gloves.
Si Paul, 28, ay may kartadang 12-1 at nagtalaga ng pangalan sa boxing matapos talunin ang dating heavyweight legend na Mike Tyson noong Nobyembre 2024, at si Julio Cesar Chavez Jr. noong Hunyo. Dapat sana’y makakalaban niya si Gervonta Davis ngayong buwan, ngunit nakansela ito dahil sa kasong sibil na isinampa laban sa WBA lightweight champion.
Ipinangako ni Paul na patutunayan niya ang kanyang kakayahan sa pinakamalaking pagsubok ng kanyang karera.
“This isn’t an AI simulation, this is judgment day… When I beat Anthony Joshua, every doubt disappears,” ani Paul, sabay humingi ng paumanhin sa fans sa United Kingdom habang nangakong “patutulugin” si Joshua.
Sa panig naman ng 36-anyos na si Joshua — isang dalawang beses na unified heavyweight champion — ito ang kanyang pagbabalik sa ring matapos matalo kay Daniel Dubois sa kanilang IBF title fight noong Setyembre 2024.
Para kay Joshua, malaking pagkakataon ang laban upang muling mag-ingay sa boxing world.
“I’m here to do massive numbers, have big fights and break every record… I’m about to break the internet over Jake Paul’s face,” ani Joshua.
Inaasahang magiging isa sa pinakamalaking boxing events ng taon ang sagupaan, dahil pagtatapatan nito ang internet superstar na si Paul at ang dating hari ng heavyweight division na si Joshua — isang laban na tiyak na hahatak ng milyon-milyong manonood sa buong mundo.