Ikinatuwa ng celebrity couple na sina John Prats at Isabel Oli-Prats ang kanilang ika-10 anibersaryo bilang mag-asawa sa pamamagitan ng isang simple pero sweet na renewal of vows sa Big Bear Lake, California.
Sa isang Instagram post, ibinahagi ni Isabel ang kanilang larawan ni John at sinabing, “Wow, 10 years married to my childhood crush and best friend.” Kwento pa niya, puno ng saya, tawa, Netflix marathons, at biglaang joyrides ang kanilang pagsasama. “Parang isang kisapmata lang, dekada na pala kami,” dagdag niya.
Todo pasasalamat din si Isabel sa Diyos, na tinawag niyang tunay na sikreto sa matibay nilang relasyon. “Cliché man pakinggan, pero Siya talaga ang dahilan kung bakit kami tumagal. Kasi kung kami lang, wala.”
Tugon naman ni John sa IG post ni misis: “Ganda ng message ah.” Cute!
Ibinahagi rin ni Isabel na simple lang ang kanilang selebrasyon kasama ang pamilya at malalapit na kaibigan sa isang resort. At siyempre, si John ang nagluto ng kanyang specialty—steak at pasta!
Aminado rin si Isabel na hindi puro saya ang 10 taon nilang pagsasama, pero sulit na sulit daw ang bawat hirap at saya: “Sabi ko nga, ups and downs, worth it!”
Maraming celebrity friends ang bumati sa kanila, kabilang na si Camille Prats.