Nagpakawala ng mga missile ang Iran sa US military base sa Qatar noong Lunes bilang ganti sa pambobomba ng Amerika sa tatlong pasilidad ng nuclear program ng Iran kamakailan. Target ng pag-atake: Al-Udeid Air Base, ang pinakamalaking base ng US sa Gitnang Silangan.
Ayon sa mga ulat, 6 hanggang 19 missiles ang pinakawalan—lahat umano ay na-intercept. Walang naiulat na nasaktan o namatay, pero nagdulot ito ng tensyon sa rehiyon.
Ayon sa Iranian military (IRGC), sagot lang nila ito sa paglabag sa kanilang soberanya:
“Hindi lakas kundi kahinaan ang mga US base sa rehiyon.”
US President Donald Trump tinawag ang atake na “very weak” at pinasalamatan pa ang Iran sa abiso bago ang missile launch, kaya’t walang nadamay. Kalaunan, inanunsyo rin niya ang ceasefire sa pagitan ng Iran at Israel.
Pero ayon sa Qatar, bigla ang atake at labag ito sa kanilang soberanya. Iran naman ay nagsabing hindi sila pumapatay ng tao sa kanilang operasyon — pero hindi rin sila magpapasindak sa sinuman.
Bakit Big Deal ang Al-Udeid Base?
Ang base na ito ang sentro ng US air operations sa Gitnang Silangan, at may ilang British troops din doon. Kaya’t ilang oras bago ang pag-atake, naglabas ng “shelter-in-place” advisory ang US at UK sa mga mamamayan nila sa Qatar. Halos 8,000 Amerikano at ilang libong Briton ang naroon.
May Senyales Ba ng Atake?
May senyales na posibleng may mangyaring missile launch — kabilang ang pagsasara ng airspace ng Qatar at pagkansela ng mga flight sa Doha. May mga ulat rin na nakitang nakaposisyon ang mga Iranian missile launchers.
Paano Nagsimula ang Gulo?
Nag-ugat ito sa sunod-sunod na pag-atake ng Israel sa mga pasilidad ng Iran simula pa June 13. Sumagot ang US sa pamamagitan ng pambobomba sa tatlong Iranian nuclear sites — na sinabing malaki ang pinsala.
Ayon sa US at Israel, ginagawa ito para pigilan ang Iran sa paggawa ng nuclear weapon. Pero giit ng Iran, para sa civilian use lang ang kanilang programa.
Ceasefire… Pero Tapos Na Ba Talaga?
Matapos ang atake, inanunsyo ng Iran na nagpakawala sila ng “huling round ng missiles” bago ang ceasefire. Israel naman, nagbabala:
“Lalaban kami kung lalabag kayo.”
Abangan kung tuluyan na nga bang titigil ang putukan — o panandalian lang ang katahimikan.