Magsasagawa ng military drills ang mga hukbong-dagat ng Iran, Russia, at China ngayong linggo sa baybayin ng Iran upang palakasin ang kanilang kooperasyon, ayon sa ulat ng Iranian media.
Ayon sa Tasnim news agency, magsisimula ang pagsasanay sa Martes sa Port of Chabahar, sa timog-silangan ng Iran malapit sa Gulf of Oman.
Lalahok dito ang mga warship, combat vessel, at support vessel mula sa tatlong bansa, kasama ang mga barko ng Iranian army at ng makapangyarihang Revolutionary Guards.
Gaganapin ang mga drills sa hilagang bahagi ng Indian Ocean na may layuning palakasin ang seguridad sa rehiyon at palawakin ang ugnayan sa pagitan ng mga kalahok na bansa.
Bilang mga tagamasid, dadalo rin ang mga kinatawan mula sa Azerbaijan, South Africa, Oman, Kazakhstan, Pakistan, Qatar, Iraq, UAE, at Sri Lanka.
Magpapadala naman ang China ng isang destroyer at isang supply ship, ayon sa Beijing defense ministry.
Matatandaang noong Pebrero, nagsagawa rin ng katulad na pagsasanay ang Iran sa parehong lugar upang palakasin ang depensa nito laban sa anumang banta.