Nagbigay ng matinding babala si Estrella “Inday” Barretto, ina ni Claudine Barretto, kay aktres Jodi Sta. Maria hinggil sa relasyon nito kay Raymart Santiago. Sa panayam ni Inday kay Ogie Diaz sa YouTube, sinabi niyang minsan nang inabuso umano ni Raymart—pisikal at emosyonal—ang kanyang bunsong anak na si Claudine. Ayon pa kay Inday, natatakot siya para kay Jodi at nagsabing, “Hindi ko siya babatiin ng good luck, ipagdarasal ko na lang siya. Pero kung hindi mo pa alam, bahala ka na.”
Dagdag pa ni Inday, may balak umano si Raymart na magpatayo ng bahay kasama si Jodi, ngunit nagbabala siyang maaaring mawala ang lahat kay Jodi kapag “tumigil na siyang maging Jodi Sta. Maria.” Hindi rin nakapigil si Inday sa pagbitaw ng maaanghang na salita laban kay Raymart, sabay pahayag ng pagkadismaya sa relasyon ng dalawa.
Hindi naman nagpatinag si Raymart Santiago at agad na tumugon sa pamamagitan ng kanyang mga abogado mula sa Calleja Law. Sa inilabas na pahayag, mariin niyang itinanggi ang mga akusasyon ni Inday at sinabing “hindi totoo at mapanirang-puri” ang mga ito. Giit pa ng aktor, ilang ulit na ring ginamit umano ni Claudine ang social media para siraan siya sa publiko. Si Raymart at Claudine ay nagpakasal noong 2006 ngunit naghiwalay noong 2013; may anak silang si Santino, habang inampon naman ni Claudine sina Sabina, Quia, at Noah.